شعر العامية المصرية في توهج وصعود دائمين، فتتغني الاجيال الجديدة بقصيدة وليدة المعاناة، تحاكي الواقع بكل ما فيه الم وصراع مع الحياة، فينتج عن ذلك شعراء جديد يحملون هموم الوطن والحياة ويتألقون في عزف سيمفونية من الجمال الروحي على هيئة صور شعرية متفردة بالجمال. محمد عبد القوي حسن.
المفتتح
آدي الجواب يا رفاقة
ومربط الموضوع
مشيت لوحدي
في السراب الطويل
ببل ريقي بعطش
وبسد جوعي بجوع
رضيت بقوتي القليل
النص
_” أول كلامي ” ريحان”
ونيل يغني لمّا تِطُلْي بالفستان
وشمس تضحك لمّا سِنَّة تبان
مع كل ضحكة يتولد إنسان
مع كل ضحكة يتقتل إنسان
“لسّاني بحلم” سيبني يا سجان
دا الحلوة عايقة وطبعها فتان
خلخال قمرها!
يا جَدعْ خلخااال !
خليني اغني واهتدي لإيمان
واحضنها مرة ان حتى حُضن خيال
ياما عملت من الحديد أغصان
وزرعت قمح وفل عالجداران
فعرفت معنى الذل لمّا اقول الحق
سجاني مش شايف في زنزانتي الخَضَار
ولا يسمع أمي توشوشني بحنان
تديني ريحة الدار
تدعيلي باستمرار
“يا رب يا غفار
أحمد يخاف م الليل اجعل حياته نهار
واحميه من الأشرار إنس أو شياطين.”
_آخر كلامي الليل ما بقتش أشوفه ليل
والشمس قاعدة معاي عُمر وونس ودليل
مين الي قال مساجين مين الي قال زنزانة ؟
آدي الخيال ميادين يتسابقوا فيه الخيالة
وحبيبتي : “نهر جميل”
“.”لمباية في القنديل”
” غيمة في القيالة ”
“بتمطر المواويل ؛ ما بطلتش قوالة ”
امشي يا سجاني من قدامي
إني عايش باشا لي خُدامي
هل تستطيع تسرقني من أحلامي
والله أبدا
والله لن تستطيع
أنا في سجنك امتلكت زمامي
امتلكت الخيال والنخيل والخيل
صدقت أوهامي
وجبت الشمس تتمشى في عز الليل
وبكل كل بساطة لبست الشجر خلاخيل
من فرط شوقي وهيامي
رقصت كل الكون على إيقاع الخليل
“رُخي يا مطرة” دا “جن شعري” بخيل
وأنا عاوز أوصل سلامي
ببرج من عقل طاير مطرح ما طاير حمامي
بقلب من كتر عصره اتقلب منديل
برا الرفاقة لسه بيآمنوا ف كلامي
لسه بيرتاحوا ف كلامي
لسه بينتفضوا لما بقول يا ريحان
لسه بينتفضوا لما بقول يا ليل .
………………
#احمد العزوني
اقرأ المزيد:
-
-
- قصيدة بالعامية المصرية.. اسأل عنيها.. للشاعر: محمد الصياد
- الطير.. قصيدة بالعامية للشاعرة: نورا عايد
- من بره.. قصيدة بالعامية المصرية.. للشاعر: مينا ليش
- الدنيا ابسط من كده.. قصيدة بالعامية المصرية للشاعر محمود حامد
- الحزن الجاي.. قصيدة بالعامية المصرية للشاعر: سمير فرج
- اصلي ازاي.. قصيدة بالعامية المصرية.. للشاعر: مصطفي يوسف
- قلب مش لايق علي البرواز.. قصيدة بالعامية المصرية.. شعر: رضا عبد النبي
-
ظهرت المقالة جواب للرفاقة.. قصيدة من شعر العامية.. للشاعر: احمد العزوني أولاً على أحداث العرب.
