🎨 «دافنشي الإسكندرية» يفتح قلبه: علمت نفسي بنفسي.. وحلمي معرض يحمل اسم مصر
كيرلس عادل جرجس، شاب سكندري لم يتجاوز الـ25 من عمره، لكن موهبته تجاوزت سنه وحدود محافظته، لتصل إلى أعين المهتمين بالفن في كل مكان. وُلد في حي “غيط العنب” الشعبي بالإسكندرية، وتخرج في كلية التربية – قسم الدراسات الاجتماعية – بتقدير “جيد جدًا”، لكنه اختار أن يكتب مستقبله بريشته بدلًا من القلم.
في هذا الحوار، يكشف كيرلس – المعروف بلقب «دافنشي الإسكندرية» – عن بداية رحلته، والصعوبات التي واجهته، وكيف تغلب على العقبات بإصرار، حتى أصبح فنانًا يحتفى به في المعارض والكنائس وفعاليات وزارات مصرية كبرى.
■ متى بدأت رحلتك مع الرسم؟
بدأت في وقت مبكر جدًا، لما كنت في المرحلة الابتدائية. كنت بحس إن رسمي مختلف عن باقي زملائي، والمدرسين كانوا بيلحظوا كده كمان. شاركت في معارض ومسابقات على مستوى المدرسة، وكمان على مستوى المحافظة من خلال وزارة التربية والتعليم. وكنت بفرح جدًا لما أزين جدران المدرسة برسومات زي الإسكندر الأكبر أو شعارات وطنية.
■ ما هي أصعب لحظة مررت بها في مسيرتك؟
الآراء السلبية كانت بتوجعني جدًا، وفي ناس كانت بتسخر من رسمي، وده خلاني أوقف الرسم فترة طويلة. لكن قدرت أرجع تاني وأثبت إن موهبتي مش مجرد هواية، وفضلت أشتغل على نفسي لحد ما بقيت فخور باللي وصلت له.
■ هل تلقيت تدريبًا أو التحقت بكورسات فنية؟
لا خالص، كل اللي اتعلمته كان بالمحاولة والخطأ. عمري ما أخدت كورسات أو اتعلمت من يوتيوب، علمت نفسي بنفسي خطوة بخطوة. ووالدتي كانت دايمًا في ضهري، بتشجعني وتدعمني، وهي الجندي المجهول الحقيقي في حياتي.
■ ما أبرز التكريمات التي حصلت عليها؟
تم تكريمي عن أعمال كتير، أبرزها رسومات للأيقونات القبطية في عدد من الكنائس، وكمان حصلت على تكريم كبير عن لوحة “السد العالي” من وزارات الزراعة والثقافة والري والبيئة، وده كان تحت إشراف الإدارة العامة للمكتبات.
■ من الفنانين اللي بتعتبرهم قدوة ليك في مسيرتك؟
بعتبر الفنان مصطفى حسين مثل أعلى ليا، بحب رسوماته الكاريكاتيرية جدًا، وبتمنى أمشي على خطاه. كمان صلاح جاهين بحسه بيعبر عن مشاعر الناس من خلال رسوماته وأشعاره. أما الأقرب لقلبي فهو ليوناردو دافنشي، وده اللي خلاني أُعرف بـ”دافنشي الإسكندرية”.
■ ما هو طموحك الفني في المستقبل؟
بحلم أعمل معرض بورتريهات كبير يحمل اسم “دافنشي” ويمثل مصر. وكمان نفسي أعمل مجلة كاريكاتير على غرار اللي ظهرت في فيلم “إكس لارج”، تناقش قضايا المجتمع بشكل ساخر، وأبطالها يكونوا من الناس الحقيقية في حياتنا.
■ ما المقولات اللي تمثل فلسفتك الفنية؟
في مقولتين دايمًا في بالي:
الأولى: “كل ما تصنعه في سبيل إرضاء شغفك هو فن”،
والثانية: مقولة لفان جوخ بتقول: “ربما جعلني الله رسامًا لأجيال لم تأتِ بعد”، ودي بتخليني أؤمن إن كل رسمة بعملها ممكن توصل لحد في وقت تاني وتغير في حياته.
🖌️ ختامًا..
كيرلس عادل ليس مجرد شاب يرسم، بل حالة فنية فريدة تستحق الدعم. اختار أن يسير عكس الاتجاه، دون تعليم أكاديمي أو تدريبات متخصصة، فقط بموهبة صادقة، وعزيمة لا تلين، وريشة صنعت طريقها وسط الصعاب. وهو اليوم يحمل حلمًا اسمه “الفن”، ويحمله على كتفيه ليقدمه لمصر والعالم، باسم “دافنشي الإسكندرية”.
مصدر الصور: facebook@kerolos.adel.3363
ظهرت المقالة كيرلس عادل.. من جدران المدرسة إلى حلم العالمية تحت لقب “دافنشي مصر” أولاً على أحداث العرب.
