الشاعر الكبير احمد الشافعي هو فخر لكل شعراء جيله، عرفناه شاعر فصحي متألق واستمتعنا كثيرا بابداعاته في الشعر الفصيح واليوم يدهشنا بنص شعري بالعامية فائق الجودة، فكل التحية لهذا الشاعر الجنوبي الكبير وفخر لنا نشر قصيدته في “احداث العرب” محمد عبد القوي حسن ..
القصيدة:
نازفة الشوارع بالبشر مسافات
و لا حد عارف سكته فيها
يا عمر عدى بالأمانى و فات
و اتاريها طلعت ..
زى بعضيها
و انا كنت اجدع صبى ..
لكنى حتما .. غبى
شايل كأنى النبى
وحى القصايد نور
و فاكرها قال .. دستور
و باخطى للأحلام فى موكب من سراب
لأ و الغريبة قوى ..
كان ينفتح لى الباب :
ادخل يا شاعر باليمين
و اكتب عن العشاق يسار
و اكتب عن العشاق يمين
من غير ما تحلف ١٠٠ يمين
باين عليك .. كدااااب
أصل الحكاية مش غناوى ع الرباب
و لا هىّ حدوتة رواها كتاب
ماتبيعش نفسك فى مزاد محسوم
دا المهر غالى قوى ..
و انت يا واد .. معدوم !!!
اقعد هناااااااك
عند آاااااااخر حلم
و الضم حكاوى ذكرياتك فيلم
و ارسم حبيبتك عبلة أو ليلى
مانتاش ح تصبح عنترة أو قيس
فى عيونها لو .. ليلة
ضفّر غناوى العندليب و منير
جمّع قصايد شوقى ويا نزار
واوصل شفايف نور مع خد صافى حرير
جايز تلاقى فى النهاية نهار !!!
جايز تلاقى فى النهاية نهار !!!
……………..
ظهرت المقالة اخر حلم .. قصيدة بالعامية المصرية.. للشاعر: أحمد الشافعي أولاً على أحداث العرب.
